中國會尋找回憶

曾經獲美國《福布斯》雜誌選為全球十大名人飯堂之一嘅「中國會」，將於明年慶祝二十歲生日。九一年與發起人「上海灘」中式服裝店創辦人鄧永鏘、已故全國政協常委徐展堂等十幾人合力創辦「中國會」嘅全國政協委員李大壯（David），眼見「中國會」深受政商界名人支持，生意蒸蒸日上，甚感欣慰，「中國會」更成為佢半頭家，早前佢仲帶卓妮參觀「中國會」，尋找昔日回憶。


David開餐前，用私家筴夾住一條餐巾當圍裙，避免弄污糟件衫。 （葉華英攝）

恍如走進《上海灘》

「中國會」位於中環銀行街舊中銀大廈十三至十五樓，面積逾一萬平方呎，布置富有老上海懷舊風情，加上一身唐裝服飾嘅David，令卓妮恍如走進電視劇《上海灘》場景。David話，「中國會」由鄧永鏘一手一腳設計，當年佢四出搜羅古董文物，好似天花嘅電風扇、廳房嘅「亨達利」牌座枱鐘、「通用」牌撥輪式電話及紅木枱櫈等，大部分「古董」由開業沿用至今。


「中國會」布置富有老上海風情，天花吊扇、掛畫及枱櫈全部由鄧永鏘搜羅返嚟。

親自建議改良菜式

「中國會」之所以成為外國人眼中富有中國特色嘅地標性會所，不但係裝修古色古香，食物水準都好高，除咗以精緻點心聞名外，小菜亦別出心裁，唔少菜式仲係David親自建議添！David推介「巧手鵝肝雲吞」、「香煎葱油餅」、「懷舊焗豬扒飯」，仲有最愛嘅「斑片梅菜蒸豆腐」，佢話呢味餸最啱就係用嚟招待外國朋友，因為傳統又夠特色。

唔講唔知，原來「斑片梅菜蒸豆腐」係由最簡單嘅「梅菜蒸豆腐」演變過來，David覺得普通蒸豆腐難登大雅之堂，所以建議廚房加入鯇魚，後來再提議改用斑片，更顯高貴。David話，斑片同豆腐清清哋無咁油膩，豉油同梅菜用嚟送飯確係一流。此外，蘭州拉麵亦係David至愛，每次去開餐都例必柯打一碗，加上有師傅即場表演拉麵條技藝，為會所增添生氣。

回想當年埋班搞「中國會」，David話係鄧永鏘游說佢入股，心諗鄧永鏘個人咁有品味，搞生意一定無蝕底，於是決定去馬，開業後愈做愈順，至今會所每呎營業額已成為全港之冠。David過去二十年來亦幫襯埋一份，平時大多數商務早餐及午餐都係幫襯「中國會」，多年來培養出深厚感情，會所更成為佢生活一部分，稱得上半頭家。

「中國會」只招待會員，入會費十五萬元或以上，每月要繳交一千二百元會費。David話，會費當係幫補「中國會」交租，減低食物成本，所以食物定價不會太貴，最終都係會員得益。


David帶卓妮到已故「中國會」主席徐展堂嘅私家廳房，緬懷一番。


「亨達利」牌座枱鐘。


師傅即場表演拉麵條技藝，製成品就係David最愛嘅蘭州拉麵。


斑片梅菜蒸豆腐


小籠包