新款電車識發電

有百年歷史嘅電車公司前年俾法國財團收購後，即刻有個兩億元嘅大變身計劃，包括將全線電車由柚木車身變成鋁合金。經過一年試行，四部改頭換面嘅新款合金「叮叮」噚日正式啟航，車號係 168、 172、 173、 174，將行走各條路線。


四部新款電車昨日正式投入服務，外觀與舊車無明顯分別。黃賢創攝


《百年軌迹》 1906年　中環


《百年軌迹》 1930年代　德輔道中


《百年軌迹》 1950年代　灣仔


《百年軌迹》 1970年代　銅鑼灣

零件都有「升呢」
叮叮迷都唔使擔心冇舊車搭，電車公司話，因為先前申請嘅加價幅度被壓低，由原先擬加到 2.5元，變成只准加到 2.3元，家陣唔夠資源，每個月先翻新到一部，要全線換晒 161部，都起碼搞成十幾年，真係愚公移山。咁講法，當完全所有翻新之日，第一輛翻新車睇怕都又夠鐘「被翻新」。

新款叮叮外形同舊款好似冇乜分別，但仔細一睇，唔單止車門設計唔同咗，連顯示牌都轉埋 LED。車身由柚木變鋁合金，車廂內櫳嘅木板就變晒玻璃纖維板，車尾經典「三截棍」式旋轉閘門變咗活門，下層左邊既橫排長椅轉做獨立座椅，座椅款式都轉埋。

電車公司話，新電車嘅零件其實都有「升呢」，新叮叮牽引系統，由以前行直流電，變咗行交流電，而且仲可以發電。點解可以咁犀利？因為呢個新交流電機喺煞車時，可以將煞車磨擦力產生嘅熱源轉做電，電流仲可以入番供電網，畀其他電車用。新車同時加入磁軌制動系統，急煞嘅時候，可以更穩定，煞車距離都可以縮短。


《百年軌迹》 2000年

保留六架唔翻新
不過好多電車迷都話，新款電車改成咁，好似冇晒懷舊味道。電車公司公司董事總經理夏睿德就話，新款叮叮更安全，乘客坐得更舒適，希望扭轉每年乘客量減少 1.5%至 2%嘅劣勢。之前申請加價幅度被壓低，亦拖慢咗翻新進度，要換晒全線 161部都起碼 10年。佢又話，知道香港人重視保育，所以最少保留 6至 7架唔翻新，當然包括保持戰後電車款式嘅 120號。