飛利浦LED電視

呢輪啲一線大廠一窩蜂推出 LED背光技術嘅 LCD薄屏電視（簡稱 LED電視），畫質確實係比採用傳統冷陰極螢光燈（ CCFL）嘅 LCD電視靚，雖然價位高兩、三成，但隨着大量生產價位慢慢回落。好似歐洲品牌飛利浦最近推出新一代嘅 LED薄屏電視 LED9000系列， size分 42吋、 46吋同 52吋三種，暫未定價。佢哋大膽將其他三個品牌嘅 LED電視，放埋一齊作出比較。


飛利浦新推 LED電視，畫質比傳統 LCD電視靚。陳亮華攝

可局部調光暗
飛利浦高級經理 Patrick解釋話，一般消費者都知 LED電視嘅畫質比傳統 LCD靚，但係唔係好知 LED背燈技術都分兩種，畫質都有唔同，分別係側光式背光技術（ Edge Type）同直下式背光技術（ Direct Type）。 Edge技術係將 LED光源放喺機背四側，大約幾百粒 LED，所以機身做到好薄，但冇局部調暗功能，會損失咗一啲畫面細節，「機身太薄，啲聲都薄埋。」

飛利浦 9000採取成本貴一、兩成嘅 Direct技術，機背鋪滿晒以千顆計嘅 LED燈，可以局部調光調暗或完全關掉，動態對比度達 5,000,000： 1，係家最高動態對比嘅 LED電視，畫面細節出番晒。

小藍即場試睇唔同品牌 LED電視， Direct技術嘅電視畫面黑位係黑啲；機身厚啲，聲音都實淨啲。 Patrick話，兩種技術各有優劣，睇吓消費者想追求薄機，定係畫質。