【特寫】踢拖抗暴 — 當催淚彈蔓延至長者社區．黃大仙黑夜

2019/8/5 — 2:04



合法遊行集會越來越難，市民逐漸習慣如流水般在街頭四散。8 月 3 日晚上，一小隊示威者從油尖旺「轉場」，先到九龍城遊擊、再往黃大仙警署外塗鴉叫囂，隨後又傳出有警察在黃大仙港鐵站無理搜捕市民，引來近千名居民群情洶湧落街聲援。踢拖街坊高呼「收隊」、「唔歡迎」、「放人」，一度迫退防暴隊，有人直指是反送中以來最「治癒」的畫面、「原來無 gear 的街坊先係最勇武」。然而下半夜，從警察宿舍掉落水袋等雜物，警察打長者、趕記者，街坊無口罩下被催淚彈圍攻，一時的喜氣又被憤怒掩蓋。對這喜怒交集的一晚，黃大仙居民這樣說：

踢拖上街

晚上十時半，一眾黃大仙街坊陸續收到訊息。視乎消息來源的政治取態，有人說：「樓下有事發生呀，好危險，唔好落去！」也有人說：「有後生仔被無理搜查，快啲落黎幫手！」

五十來歲的 Fanny 和 Tammy 兩姐妹住在黃大仙下邨，Fanny 說：「本身昨日休息，因為反送中以來行咗好多次，想俾自己抖吓氣。」她到了新蒲崗逛街，不料衝突來到家門下，唯有「行街 look」無裝備地過去。Tammy 則在家中工作和看直播，一直以為戰線在旺角和尖沙咀，忽然收到訊息說樓下出事，「聞一吓，又的確有些煙味」，穿對涼鞋換件衫便落街，覺得只是落樓下看看，「點知我哋連頭盔都無，警察就出紅旗，仲連阿伯都打。」

她們相信，在場街坊不是特別勇武，更多是因為正德街一帶的地鐵出口被警察封鎖線堵住了，而那裡是街坊返家的必經之路，所以滯留現場，「從商場放工的店員、保安，搭巴士回家要往上邨、東頭邨的居民，搭地鐵返下邨的居民，還有在冬菇亭食完宵夜的，都要經過那個位回家。好多人係因為被警察塞住返不到去，才聚起來。其實本身就無嘢嘅，有個街坊講得好啱，『有警察先至混亂』。」

人群中也有馬先生的爸爸。本身二十來歲的馬先生，看到直播消息十分生氣，「好想衝落去聲援，可是家人制止了，佢哋覺得警察而家已經失控，就算你好和平、都會被打。」結果他爸爸代他落街，「佢話自己年紀大，應該不會被攻擊。」爸爸也是踢拖就落樓了，「不是故意，就是抱著平時落街的心情和裝扮，但結果都食咗催淚彈。」「如果是另一區調來的警察，當係平時處理示威者的方式咁打人，可能都較易接受。但如果係黃大仙警署的警察、咁樣打返我哋自己區的街坊，我會覺得好過份。昨晚的所作所為，係對街坊非常敵視的行動。」


8 月 3 日晚上，黃大仙警民衝突

螢幕前的他們

居於黃大仙下邨的林太則因為忙於家務，只能一邊聽直播，一邊傷心憤怒：「點解要嘥納稅人啲錢來打納稅人？我真係唔明點解仲要交稅。人地都有阿媽生，你今日咁打人，他朝難保你家人也被人打。如果示威者係被煽動、佢哋爭取的是錯的，點解唔止小朋友出嚟、咁多公務員都出嚟發聲？昨晚好多人特登在附近停車響安，從樓上大叫『黑警收皮』，你見到其實好多人支持佢哋。」

二十來歲的 Eric 和 Alan 同樣關心事件，但遭家人反對而未能出門聲援。兩人在黃大仙長大，見到事件蔓延至區內，「的確有種踩著自己『地頭』，要守護家園的感覺。」雖然未能參與，Eric 把握機會跟家人溝通：「我即刻開直播俾佢哋睇，佢哋原本淺藍的，睇完都有少少變淺黃：『哇！搞錯呀，明明個個都係街坊嚟，都出晒紅旗黑旗！』」Alan 的家人則沒變：「（示威者）唔升級就唔會被搜捕啦。」

老人區＝藍絲社區？

黃大仙長者比例高，在事件發生前，無論區內外的市民，都會認為這是個藍絲社區、建制票倉，「我哋常開玩笑話哩區應該叫『藍大仙』架嘛，想不到都有咁多人落嚟！」Eric 說，平日黃大仙的長者相對安靜，區內連儂牆只有小破壞、小爭執，未有如大埔九龍灣等起嚴重衝突，也不算聽到太多批評示威者的高談闊論。「惡言相向係少嘅。遇到有藍絲不滿我哋，傾到就溝通吓；有啲一口咬定參加參會就是暴徒嘅，就無得救，我會放棄唔理佢算。今次應該明眼人都睇到啦，咁多街坊返唔到屋企，建制派區議員有無人落嚟幫過手？我就只見到譚文豪囉。」

然而千名街坊也確實只佔區內少數。記者翌日走訪事發地點黃大仙下邨一帶，也有不少中老年居民一聽到昨夜示威就滿臉鄙夷地拒絕受訪。有長者明言「好滋擾，跑來跑去打足一晚，全晚瞓唔到，啲車又響安。抗爭係可以，但唔好搞到咁吖嘛。」

同一件事，部份長者的解讀可以完全不同。例如黃絲對於很多人踢拖上街感到振奮，「證明佢哋係真街坊啦！」但年長的何太則認為：「係啲示威者特登換咗裝之嘛。」黃絲認為路過車輛響安證明萬眾一心、行動獲得大多數市民支持，何太則說：「你睇佢哋，又有車配合、又有物資送來，證明一定有組織有勢力支持。唔係話個個都收咗錢，但係有政黨人物為個人利益動員出來的，年輕人自己目標幾正確都無用，會被個洪流帶咗去做錯事架嘛。」

廟前之約

8 月 5 日的七區三罷集會中，九龍東的集會地點定在黃大仙區、黃大仙廟前的廣場上。說是廣場，目測不消一萬人就會逼爆，而對出就是龍翔道。人一多，會否自然發展成佔路然後演變成武力驅散？馬先生明言即使這樣，也要出來：「而家每次有示威集會，我哋都要擔心面對更高武力的了。因為警方已經失去規範，佢踏出咗犯規的第一步，行到今日，唔見得再會收回。就算射催淚彈射到入廟內，佢哋都會搵理由合理化自己嘅決定。」

Tammy 亦決定了參與，「希望做個勢，讓年輕人感到有人支持。我覺得昨晚搞到咁大鑊，都係想激嬲啲人、想佢哋做啲好激嘅事出來，影響到八月五日個集會搞唔成。警方應該係故意的，你睇次次遊行前都話發現炸彈、平時又唔發現？」林太說家人都會參與罷工，無奈自己是主婦，照顧小孩的任務一天也停不了：「雖然自己出唔到嚟，但都好支持罷工、用和平集會等方法，等年輕人唔洗流血。我都希望年輕人唔好用武力衝擊，因為一有衝突，我哋無武器，受傷的永遠都係市民。如果連靜坐集會都打，就全世界都見到你唔啱啦。」

Alan 做會計行業，公司都傾向支持罷工，告知同事可以請假；Eric的公司則沒有明顯取態，也沒阻止員工自行安排。「而家件事已經發展到唔止係示威者與政府的角力，而係全香港都受影響，所以應該每個人都要有個決定了，無論支持還是唔支持，都要有立場囉，無得話自己係中立或政治冷感、然後唔理了。」


區內首次警民衝突翌日，有年輕抗爭者於黃大仙廣場上展示標語，呼籲街坊參與八月五日三罷及集會。

文：林茵

---------------------

8月3日晚黃大仙警民衝突經過簡述

22：30 有市民包圍黃大仙警署，在警署外牆噴上標語及拆閉路電視。警署門口對出馬路上，部分工程用水馬及安全欄被橫放在馬路，有年輕男子被十多名配圓盾、警棍的便衣及防暴圍著包圍、並懷疑被搜出口罩和頭盔。有街坊與警方口角：「搞咩啊你地，咁鬼多人。」

23：00 黃大仙中心商場南館對出的正德街上，過百名市民與警方對峙，大部份市民沒戴口罩，甚至穿上拖鞋。警方堵塞了地鐵出入口。十多架警車從黃大仙警署開往黃大仙中心巴士總站增援。有街坊與防暴警理論及對罵，警方出示紅旗，並在未有推撞情況下突然推進。

23：25 市民持續高呼「黑警」、「 黃大仙，唔歡迎」、「走啦」。警方開始後退回巴士總站，大部份上車並開車離去，但有兩輛載有防暴警的警車被市民包圍。市民一度用傘擋住或敲打警車玻璃。其後數名防暴警察下車，多次用胡椒噴霧噴向人群，並用警棍追趕市民。及後兩輛警車逃脫巴士總站。

24：00 其時市民已聚集至過千人，大部份人沒有戴上頭盔、口罩等裝備，跟隨警車到沙田坳道及東頭村道的十字路口。逾百名防暴警到場。雙方距離超過40米。期間不斷有市民向警方投雜物，但不時聽到有人大叫「唔好掟！前面好多記者」。警方舉起黑旗，連續向人群施放兩輪催淚彈。市民退回巴士總站及到睦鄰街公園暫避，但不久又回到十字路口。由於群情洶湧，所有防暴沿路退守至位於親仁街的黃大仙總部，並關上閘門。市民跟隨至總部，用激光射向更亭及在內建築物。

00：40 先後有水袋和玻璃樽從沙田坳道的警察宿舍擲下，發出巨響。在場人士用激光射向涉事單位，並打開雨傘防備。又有燃燒的炮仗在群眾中爆發，部份市民退到睦鄰街警察宿舍車閘入口，閘內約 20 名懷疑宿舍居民手持木棍和水喉、與在閘外約 30 名示威者爭執，雙方互擲物品。約十多分鐘後有消息指防暴即將到場，大部份市民向巴士總站散去，剩下少數記者。不久約 80 名防暴到達到睦鄰街，有防暴不停揮動警棍並用長盾推撞記者，更向記者群發射催淚彈和胡椒噴霧。

01：10 部份示威者轉往龍翔道，在西行三條行車路架設路障，但東行仍能通車。約二十分鐘後，龍翔道傳來防暴將至的消息，市民紛紛跨過石墩往北面的黃大仙廟及公園方向逃去。防暴到達時龍翔道上只剩下十多名市民和約 20 名記者。防暴持續驅趕及推撞已退上行人路的記者，又搜查路過市民。凌晨二時，市民及記者陸續散去。