粵港八項合作協議內容

1. 探討在前海推進現代服務業發展

2. 落實CEPA及補充協議五、六和在廣東先行先試的政策措施

3. 成立專責小組，推動金融合作

4. 推動港深機場軌道連接早日達成共識，並在深圳前海設立口岸，便利兩地人流物流

5. 推動疾病聯防聯控合作，包括開展疫苗研發及生產，提高兩地應對傳染病能力

6. 創新合作辦學模式，積極推動香港高等院校在廣東合作辦學

7. 致力改善區域空氣質素，推動資源循環利用和企業清潔生產

8. 提高知識產權發展與保護水平

粵港兩地政府噚日簽署8份協議文件，傳媒亦都在場見證，由於一半簽署嘅都係內地官員，所以主持就用普通話主持會議，不過做主持嘅政制及內地事務局政務官，普通話就認真麻麻，唔單止唔標準，連一口的在場嘅內地記者聽完都唔知發生咩事，連協議簽完都唔知。

請特首粵省長「消失」

主持粵港兩地政府簽署文件嘅政制及內地事務局官員，似乎都真係要好好學習改進普通話，喺協議簽完後，佢不斷叫特首曾蔭權同廣東省長黃華華先到隔離房「消失」（本意應該係請兩人到隔離房休息），其他官員就到二樓「消失」，令到唔少記者偷笑。呢位政務官相信都唔會咁無禮貌、咁大膽叫佢口地消失，而係叫佢口地稍移玉步休息一下，不過就將廣東話求其讀音改少少，結果就將休息讀成消失。

內地記者唔知簽完協議

雖然Emily都大約知道呢位政務官講咩，但內地行家就似乎聽到一頭霧水，完全唔知佢講咩，當兩地官員簽署咗8份文件後嘅休息時間，有兩個內地行家就問Emily，幾時先會簽文件，當佢口地知道已經簽咗，就即刻拎住在場派嘅資料，問係咪就係簽咗文件上列出嘅協議。