玩得最豪　柬埔寨國王宮殿

雖然旅行社嘅廣告上面成日有豪華團推介，不過無論個豪華團住得幾舒適、食得幾招積，都唔夠今次介紹嘅地方咁豪，因為今次要介紹嘅地方就係柬埔寨嘅王宮，柬埔寨國王都住喺度，夠豪華喇呱，聖誕節想去旅行又未諗定去邊？去柬埔寨王宮豪體驗一下王室生活啦！

撰文：王琼澍

金、銀堆砌嘅宮殿

　　柬埔寨表面睇嚟好似無乜嘢玩，不過其實佢都曾經威過㗎，柬埔寨以前叫高棉，喺10世紀至13世紀，高棉族建立咗吳哥王朝，國力遍及東南亞地區，而依家嘅柬埔寨建築亦保留咗鼎盛時期嘅高棉文化，好似喺金邊柬埔寨國王西哈莫尼居住嘅王宮，入面有20幾楝建築物，用咗以噸計嘅寶石同金、銀打造而成，睇落楝楝都金碧輝煌。而建築物多數都喺黃、白兩種除咗表面金碧輝煌之外，王宮入面都好豪華，好似正殿嘅天花板畫滿咗壁畫，加上周圍嘅雕像，感覺尊貴。而皇宮入口左邊嘅銀閣寺，地面鋪咗5,000塊、每塊1公斤嘅純銀磚，雖然寺內原本收藏嘅文物好多都被人搶走咗，不過現時仍有1座半米高嘅翡翠玉佛、1座重90公斤嘅金佛、1幅40幾厘米高嘅鑲金壁畫等，而走廊牆壁上仲畫咗歷代王朝功績和宗教故事嘅壁畫，都好值得睇㗎。

地址：Samdech Sothearos Boulevard、Phlauv 184與Phlauv 240之間
門票：US$6
開放時間：早上7時30分至11時、下午2時至5時

國家博物館睇石像

　　感受完王宮嘅金碧輝煌，仲可以去埋附近嘅國家博物館。博物館雖然唔係用金、銀堆砌，不過博物館出面擺放嘅婆羅門教同佛教嘅石像，手工非常精細，藝術價值高，而且仲可以見到高棉宗教文化嘅一面。至於展館入面雖然簡陋，不過就收藏咗近2,000件展品，當中包括4-10世紀吳哥王朝時期嘅手工藝品同雕刻，仲有法國攝影師拍攝嘅吳哥照片，睇完就可以了解多啲柬埔寨嘅歷史。

地址：位於王宮旁邊
門票：US$3
開放時間：早上7時30分至11時、下午2時至5時

四臂河遠觀金邊

　　近距離睇完王宮、博物館，喺金邊就梗係要睇埋四臂河啦！柬埔寨嘅四臂河與湄公河其實係同一條河流，不過條河流入金邊之後分成2條支流，1條係洞里薩河，另1條係百色河，因為由高望落嚟就好似4隻手臂，所以又叫做四臂河。四臂河就梗係要坐遊船參觀架啦，喺個半鐘嘅船程入面，除咗可以睇到兩岸嘅風景，仲可以見到柬埔寨水上人家嘅樸素生活。值得一提嘅係，四臂河嘅游船都會有柬埔寨小食供應，都幾有特色。

四臂河遊船：於河濱公園上船。
遊船票價：US$3-US$6。
營業時間：早上8時至下午6時。

西哈努克玩水上活動

　　柬埔寨除咗有古蹟睇，仲可以去西哈努克玩。西哈努克喺柬埔寨嘅西南面，係柬埔寨最大嘅海港，和柬埔寨其他城市相比比較現代化，而西哈努克嘅勝利海灘，海灘長2公里，被礁石和小山分成兩段，北段有大貨船來來往往，係西哈努克看日落最好嘅地方，而南段又稱夏威夷海灘、國王海灘。好多外國人都鍾意喺沙灘上度假，食即烤嘅魚蝦同海鮮，又可以租船出海。

交通： 由金邊去西哈努克，可以乘坐長途巴士，Orussey Market及中央市場附近均有車站，車程約3-4小時，車費每人US$4-US$7。


柬埔寨旅遊小貼士

機票： 港龍航空香港飛往柬埔寨金邊，來回經濟客位$3, 940起。(網址：http://www.dragonair.com/da/en_INTL/homepage)
簽證： 持特區護照或BNO 均須簽證，費用US$20，可逗留30日。查詢：2546 0718 (柬埔寨領事館)
貨幣：1港元約兌522里爾。
天氣：12月份氣溫約攝氏17-23度。
時差：慢香港1小時。