Orbit腦控直升機 念力起飛

無論喺電影《變種特攻》，或明珠台播緊嘅《異能行者》，超能人只要舉起隻手，便可利用念力移動物件升降。原來喺現實中都可以，仲連手都唔使舉起添，講緊係美國廠商Puzzlebox推出嘅Orbit直升機。


Orbit以中空球形設計，十足古代「蹴鞠」嘅波。售價：$2,680




跟機有多一Set螺旋槳做後備，可自行更換。

佢睇落同一般遙控玩具冇乜分別，用家只要帶上特製耳機，單靠腦電波便可控制佢飛嚟飛去，超科幻呀！

中空球形設計
顧名思義Orbit嘅創作靈感源自星球軌道（Orbit），採用中空球形設計，加上幾條支架包圍，外形搞鬼。不過小記覺得佢個樣似古代足球「蹴鞠」嘅波，好處係點跌點撞都唔怕整爛。其內部構造與一般遙控直升機接近，備有雙螺旋槳，底部則設有摩打及電池，設計的骰之餘，40g嘅重量相當輕巧；不過亦因為機身太輕，所以最好喺室內或者冇乜風嘅時候玩，唔係隨時失控。


內置電池每次大約玩到15分鐘。


備有雙螺旋槳，升起時都幾穩定。

起飛靠腦電波
設計夠特別，估唔到連玩法都特別過人。一般直升機玩具會透過遙控器或手機控制，但玩Orbit只需一個腦電波耳機，玩家將位於前額的感應器掂住額頭，再將另一端夾實耳珠，便可量度玩家嘅腦電波。戴穩耳機之後，仲要將另一個小型紅外線接收器插入Android或iOS裝置，下載埋個專屬App與耳機配對，咁就玩得。耳機會量度玩家嘅腦電波活動，之後轉化成訊號經手機傳至Orbit，從而令直升機升起。


失敗
Orbit一開着感應到腦電波會隨時起飛，千祈唔好擺咁近自己呀！


成功
Model只要做簡單心算，即可令Orbit起飛，佢大讚好玩。

集中力好緊要
有咁過癮嘅玩具，小記身邊嘅同事當然爭住試玩，但見Orbit有時升得起，有時靜止唔郁，究竟點解呢？原來控制佢需要集中（Attention）或者放鬆（Meditation）進行，App會同步顯示玩家嘅腦電波數據，只要讀數達到一定標準，玩具便會自動起飛。聽落幾抽象，故廠商畀咗幾個貼士玩家，例如要令Attention讀數上升，玩家可試吓集中望住一點，又或者嘗試複雜心算、將中文翻譯成英文等，記住唔好行來行去或者講嘢。想令Meditation讀數上升，只要合埋眼深呼吸、將心情保持平靜就得。


DETAIL'S CHECK
腦電波耳機的感應器設有金屬片，一定要貼住前額皮膚。


耳夾要夾實耳珠，再推一推旁邊的開關鍵，燈號閃閃吓便可配對。

試玩後感
雖然廠方講明唔同人諗唔同嘢都有唔同效果，但小記同Model試玩後，發現玩多幾次就捉到佢個Pattern。而Orbit可以向任何方向飛，美中不足係用家暫時唔可以用腦電波操控佢飛向左或右。


將紅外線接收器插落手機3.5mm插口就玩得，記住要將Volume校到最大。


Orbit及紅外線接收器都要用附送嘅USB線充電，充電時間約15~20分鐘。