「長生藥」　屈臣氏每樽$388

「超人」李嘉誠89歲，依然活力充沛，每次出席活動都精力十足，亦可以同年輕人打成一片。據了解，超人之所以咁精靈，同佢近年投資嘅抗衰老產品都有啲關係，做到「內服外敷」。如果你想學超人點樣養生，機會嚟喇。

內服嘅，就有由超人紅顏知己周凱旋打骰嘅維港投資今年4月投資咗美國一間抗衰老製藥公司ChromaDex，呢間公司主打嘅「不老藥」Tru Niagen香港終於有得賣。

下周五香港門市有售
最快下星期五（15日）就可以喺本港屈臣氏門市同網上電子商店買到，每樽388元，一樽60粒夠一個月用。目前已經可以喺屈臣氏網上預訂，一套3樽988元，平均330元，平少少。

外敷方面，超人一早投資咗日本嘅護膚品研發公司Nanoegg，旗下豊麗推出咗3支針對保濕、去紋、淡斑嘅產品，一套大約2,100蚊。

華華之前搵過風水師麥玲玲試用一星期，佢都覺得效果唔錯，「幾rich幾thick」。但要買呢3支產品，暫時主要去Nanoegg網站買，未知屈臣氏幾時有得賣。

據了解，超人自己有食Tru Niagen，而周凱旋就用Nanoegg產品，唔知第時會唔會用情侶檔做宣傳呢？

李華華

■超人都有食嘅Tru Niagen。


■3款Nanoegg產品周凱旋都有用。