特步擲億元胸降伯明翰 中國品牌波衫現身英超

取代 Umbro　贊助五個球季
伯明翰環球（ 2309）主席楊家誠 Carson，做咗英超球隊伯明翰班主後，隊波近排踢到唔識輸，噚日仲同祖國運動服裝品牌特步（ 1368）簽咗贊助權合約，由今年 8月至 2015年五個球季內，波衫會以「特步-伯明翰」（ Xtep-BCFC）品牌出品，取代 Umbro，而伯明翰就可收到 9000萬元贊助費同價值 1000萬嘅運動服裝。

家英超踢咗一半，伯明翰拎到 33分排第八，華華睇番佢哋以前嘅紀錄，好大機會唔使降班，話唔定下季有機會進軍歐洲賽㖭。

華華計過，就算真係唔好彩，伯明翰下季踢完英超要降返英冠，特步使一億銀已經可以喺數以億計球迷面前，賣足九個月（英超球季）廣告宣傳，計落都唔算好貴，如果踼足五季英超，除開每年都唔使 2000萬㖭！

另外， AON（怡安保險）同渣打下季將分別頂替 AIG同嘉士伯，成為曼聯同利物浦嘅新贊助商，四年同樣盛惠 8000萬英鎊，折算每年要成 2.5億港紙。雖然伯明翰收到嘅贊助費唔及呢啲大球會一成，但以中下游球隊嚟講已經唔錯，一家便宜兩家着啦！


伯明翰班主楊家誠（左）噚日同特步總裁丁水波（右），落實簽贊助權合約。

伯明翰（2309）老細楊老闆認真厲害，入主伯明翰後有連續14場比賽不敗紀錄。打破這球會102年的歷史紀錄，目前英超排名仲係第8位，隨時有機會殺入英超5名內打歐霸盃，計埋廣告費、轉播權費，波飛收入自然財源廣進，伯明翰股價隨時可見0.5元，就直望0.6元。

　　伯明翰成績超理想，加上內地市民對於有華人買起英超球隊，自然有多兩錢肉緊，馬上獲得內地大型體育品牌特步（1368）贊助，隨即獲得特步未來5 年內9,000 萬元的贊助費。其實，神舟一號睇番份公布，伯明翰未來睇賺錢來源仍有兩個。

　　首先特步每賣出一件伯明翰運動服裝，伯明翰都可獲得收益，以其他同業計算，約為8 %至10%，以內地對伯明翰的熱潮，條數有排計。

　　上述條數雖大，但另外一個合作項目更厲害，伯明翰將會與特步建立合營公司，各佔5 成，將會銷售「伯明翰-特步」的休閒服。

　　以特步在國內有約6,000 間分店，每間都有銷售休閒服，以一日營業額1,000 元計，每日營業額就有600萬元，1 年營業額有22 億元。以伯明翰佔50%，即有11 億元，扣除租金及其他成本，每年都有4、5 億元收入。以伯明翰昨日市值14 億餘元，休閒服店市盈率只得3 倍，特步昨日市盈率都有17 倍，如果休閒服以10倍市盈率計，伯明翰每股就值2 元，仍未計球隊、球場等等其他業務，怪不得伯明翰愈升愈有。